Србија имаше катастрофално ЕП во Германија. Освои само два бода на трите натпревари, заврши на последното место во групата зад Англија, Данска и Словенија и прерано се врати дома.
Како главна причина за неуспехот, навивачите го сметаат селекторот Драган Стојковиќ. Според нив легендарниот фудбалер Пикси едноставно нема стручни квалитети да ја предводи Србија, а се чини дека со тоа се согласуваат и некои фудбалери.
Српските медиуми пишуваат дека дошло до „бунт“ во соблекувалната на „орлите“ и оти неколку големи ѕвезди наводно најавиле дека нема да играат за Србија се’ додека Пикси е на клупата на репрезентацијата.
Телеграф наведува дека феноменалниот голман Предраг Рајковиќ одлучил да не игра за Србија, а на таа „одметничка“ листа се и капитениот Душан Тадиќ, Сергеј Милинковиќ-Савиќ и Александар Митровиќ.