Грчкиот Олимпијакос го освои првиот европски трофеј во клупската историја. Во финалето на Лига на конференции (ЛК) на домашен терен, во Атина, на стадионот на градскиот ривал АЕК, Олимпијакос ја совлада Фиорентина со голот на Мароканецот Ајуб Ел Кааби во 116. минута, за големо славје во Пиреја кое ќе трае со денови.
Италијанската Фиорентина остана без трофеј во ЛК втора година по ред. Лани во Прага, англискиот Вест хем беше подобар од „виолетовите“ од Фиренца.
Финалето во Атина не беше претерано возбудливо во регуларниот дел бидејќи и двата тима не ризикуваа премногу. Во судиското надополнување се чинеше дека ќе се оди кон пенали, но во 116. минута Ел Кааби (30) погоди на додавање на аргентинскиот играч за врска, Сантијаго Хезе (22).
Шпанскиот тренер на клупата на Олимпијакос, Хозе Луис Мендилибар сега има два европски трофеја. Лани ја предводеше Севилја до триумф во Лига Европа (ЛЕ).