Француската Влада ја подигна тревогата за тероризам на највисоко ниво по трагичниот настан во Москва, изјави во неделата премиерот Габриел Атал по состанокот на високи претставници за безбедност и одбрана со претседателот Емануел Макрон.
Во објавата на X, Атал рече дека одлуката која доаѓа неколку месеци пред Париз да биде домаќин на Летните олимписки игри (ЛОИ), е донесена „во светло на преземањето одговорност на Исламската држава за нападот (во Москва) и заканите што и се закануваат на нашата земја“.
Францускиот систем за предупредување за тероризам има три нивоа, а највисокото се активира по напад во Франција или во странство, или кога се смета дека заканата од напад е непосредна. Овозможува исклучителни безбедносни мерки како што се зголемени патроли на вооружените сили на јавни места како што се железнички станици, аеродроми и места за богослужба.
Четириесет и осум часа по нападот во Москва, чиј биланс сè уште не е целосен, државниот врв се обиде да ги одмери геополитичките последици од нападот за кој одговорноста ја презеде Исламската држава и нејзините последици на француска територија.
Планот „Вигипирате “ беше намален на ниво 2 („засилена безбедност – ризик од напад“) во јануари, но сега повторно е активирано највисокото ниво на тревога.
Французите тврдат дека неодамна спречиле напади на ИСИС. „Тврдењето за нападот врз Москва доаѓа од Исламската држава во Хорасан. Оваа организација и се заканува на Франција и беше вклучена во неколку неодамнешни спречени планови за напад во неколку европски земји, вклучително Германија и Франција“, се додава во извештајот.
Денеска треба да се одржи состанок на сите безбедносни служби, а полицијата ќе изврши дополнителен преглед на лицата кои се идентификувани како „ризични профили“ во областа.
ЛОИ во Париз треба да се одржат од 26 јули до 11 август, а Параолимписките игри (ПОИ) од 28 август до 8 септември.