Напаѓачот на Баерн Минхен, Хари Кејн, продолжи со групните тренинзи во средата, но капитенот на Баерн, Мануел Нојер останува неизвесен за саботниот натпревар против Борусија Дортмунд.
Шампионот на Бундеслигата објави официјално соопштение во кое вели дека Кејн „повторно можел да учествува на групни тренинзи“ откако продолжил со индивидуалните тренинзи во понеделникот. Нојер, кој денеска наполни 38 години, го скина мускулното влакно додека беше со репрезентацијата на Германија, поради што не играше и против Франција и Холандија.
Кејн го повреди скочниот зглоб откако удри во една од стативите во победата на Баерн над Дармштад од 5:2. Капитенот на Англија поради повредата ги пропушти пријателските натпревари на својата репрезентација против Бразил и Белгија.
Во меѓувреме, баварскиот гигант, кој има десет бода помалку од лидерот во Бундеслигата, Баер Леверкузен на осум кола до крајот, соопшти дека ќе игра контролна средба со поранешниот тим на Хари Кејн, Тотенхем пред почетокот на следната сезона.