Во СЦ „Борис Трајковски“ во Скопје попладнево (18 часот) треба да се одржи вонредното Собрание на Македонскиот олимписки комитет (МОК), на барање на 26 национални спортски федерации, меѓу кои и водечките, РФМ, ФФМ, КФМ, ОФМ, како и на повеќемина поранешни познати спортисти и спортски работници.
Главни точки на дневниот ред се смена на актуелниот прв човек на МОК, Даниел Димевски, избор на нов претседател, како и разрешување и избор на нов Извршен одбор (ИО).
Како главен кандидат за наследник на Димевски се споменува(ше) Александар Маленко, еден од иницијаторите за промени во МОК, но во „игра“ е и Александра Војневска Зикова, претседателката на Атлетската федерација на Македонија (АФМ).
МОК пак, на чело со Димевски, за 8 феваруари во СЦ „Јане Сандански“ закажа редовно изборно годишно Собрание.
Останува да видиме каква ќе биде разврската од оваа рашомонијада бидејќи Интернационалниот олимписки комитет (ИОК) е на ставот дека за нив легитимно е редовното Собрание во организација на сегашното раководство на МОК.