Светскиот шампион на друмски трки, од Глазгов лани во август, Матје ван дер Поел, победи на Трката околу Фландрија, во Белгија, на делницата долга 270 километри.
Холанѓанецот (29) е седмиот велосипедист со три победи на оваа трка (во 2020 и 2022-та) и првиот што се искачил на победничкиот подиум на „Монументалната“ трка во пет последователни сезони (во 2021 и 2023-та беше втор).
-Тоа беше една од најтешките трки во мојот живот. Бев „мртов“ во последните неколку километри, но ги затворив очите и продолжив да ги притискам педалите, изјави Ван дер Поел, кој ќе биде фаворит и на трката Париз – Рубе следната недела.
„Монументали“ се нарекуваат петте класични еднодневни пролетни трки, Околу Фландрија, Милано – Сан Ремо, Париз – Рубе, Лиеж – Бастоњ – Лиеж и Џиро ди Ломбардија.
Ланскиот победник, Словенецот Тадеј Погачар не учествуваше на трката бидејќи сезонава е фокусиран на Џиро д’Италија и на Тур де Франс.
Кај жените, победи Италијанката Елиза Лонго Боргини (32) која е петтата велосипедистка што победила двапати на Трката околу Фландрија, првиот пат во 2015 година.