Јужна Кореја се пласираше во четвртфиналето на Купот на Азија во фудбал што се одржува во Катар, откако во осминафиналето ја совлада Саудиска Арабија со 4:2, по подоброто изведување пенали откако натпреварот заврши без победник, 1:1.
Тоа беше и судир меѓу двајца истакнати европски тренери/селектори. Саудијците ги предводи Италијанецот Роберто Манчини, а Корејците, Германецот Јирген Клинсман.
Саудијците поведоа во 46. минута со голот на Абдула Радиф и кога се чинеше дека ќе стигнат до четвртфиналето, за прв пат по 2007 година, Чо Гуе-Сунг израмни во деветтата минута од судиското надополнување на времето.
Во дополнителните половина час немаше голови, па прашањето за победникот го решаваа пеналите. Херој стана корејскиот голман Хјеон-Ву Џо кој ги одбрани ударите на Сами ал Неџеи и на Абдулрахман Гареб во втората и во третата серија. Од друга страна сите играчи на Кореја беа прецизни.
Во четвртфиналето Кореја ќе игра со Австралија.
Узбекистан предводен од словенечкиот стручњак Среќко Катанец, своевремено и селектор на Македонија, исто така се пласираше во четвртфиналето благодарение на победата против Тајланд со 2:1.
Противник на Узбекистан во четвртфиналето ќе му биде домаќинот и бранител на титулата Катар, кој ја елиминира Палестина со 2:1.
Во последните два осминафинални натпревари (денеска) се среќаваат Бахреин – Јапонија и Иран – Сирија.