Некогашната светска тенисерка број 1, Романката Симона Халеп, доби покана за настап на Мастерс турнирот во Мајами што започнува на 17 март.
Организаторите објавија дека на Романката и дале „вајлд-карта“ за главниот турнир, откако пред неколку дена и беше укината четиригодишната суспензија поради допинг.
Халеп, побдничката на Ролан Гарос 2018 и на Вимблдон 2019-та, се жалеше на казната до Спортско арбитражниот суд (САС) по што и беше намалена на девет месеци.
– Возбудена сум што можам да објавам дека ќе им се вратам на ВТА турнирите, за две недели на Мајами опен. Му благодарам на турнирот што ми ја даде таа можност и едвај чекам да се вратам на теренот и да се натпреварувам, напиша Халеп на социјалните мрежи.