Попладнево (18.30 часот) на арената „Алијанц“ во дербито на 27.коло, или „Дер Класикер“, по 135-ти пат ќе се сретнат големите ривали, Баерн Минхен и Борусија Дортмунд.
„Дер Класикер“ е меч меѓу двата најуспешни тима во германскиот фудбал, кои имаат освоено 26 од минатите 30 титули во Бундеслигата, до сезоната 2022/23.
Претходно сезонава, Баерн славеше на гости со 4:0, со што ја продолжи низата од 16 победи на последните 20 средби, постигнувајќи притоа неверојатни 60 гола. Борусија е без победа на последните 11 натпревари против Баерн во сите натпреварувања, нивната најдолга ваква серија против Баварците од 2002 година.
Баварците имаат импресивен скор во дуелите со Борусија Дортмунд, 67 победи на 134-те натпревари, наспроти 32-те победи на Борусија. Тие 32 порази на Баерн од Борусија, во сите натпреварувања, се повеќе од кој било друг тим во германскиот фудбал.
Борусија го нема победено Баерн во првенствен натпревар од сезоната 2018/19. Тој скор е уште полош кога се гледаат само натпреварите во Минхен, каде што гостите немаат победа од времото на Јирген Клоп, пред 10 и повеќе години.
Баерн и Борусија ќе се соочат еден против друг во втората половина од сезоната без ниту еден тим да е на врвот на табелата Бундеслигата, за прв пат по 14 години.
Во последните 15 години, традиционално ова беше средба меѓу најдобрите два тима, при што Баерн рутински победуваше.
Но во необичната, освежувачка сезона во Бундеслигата, моментално Баерн, кој е втор на табелата со 60 бода и Борусија (четврта) ги делат 10 бода. Баерн пак има минус 10 поени зад лидерот на табелата, Баер Леверкузен, кој е без пораз сезонава.