Најдобриот македонски атлетичар, Дарио Ивановски кој минатиот викенд во Севилја постави нов државен рекорд во маратон (2:о8,26 часа), ќе настапи на Европското првенство (ЕП) во атлетика во Рим, Италија (од 7 до 12 јуни), во дисциплината полумаратон.
Тоа треба да претставува увертира пред настапот на Ивановски на Летните олимписки игри (ЛОИ) во Париз летово, во маратон.
– Целта на Дарио е пласман меѓу првите пет, зошто не и медал на ЕП, напиша на Фејсбук неговиот тренер и менаџер, Игор Јакимовски кој има огромни заслуги за одличните резултати на Ивановски.
Јакимовски појаснува некои работи за моќта на резултатот на Ивановски во Севилја и за потребната норма за настап во Париз.
– Нормата за маратонската трка за Игрите во Париз изнесува 2:08,10 часа. Дарио истрча 16 секунди послабо и таа норма му избега „за влакно“.
Инаку нормите за ЛОИ во сите дисциплини се поставени на многу високо ниво и речиси во ниту една дисциплина нема атлетичари со исполнети норми, односно потребната квота се исполнува според ранкингот на светско ниво.
Во тој дел Дарио има резултат кој го става на 73-то место од квотата од 80 учесници за олимпискиот маратон. Според мене и сите можни реални пресметки, тој може да падне максимум за три позиции, никако за осум, истакнува Јакимовски.