Сан Антонио спарс стигна до четвртата победа во низа совладувајќи ја Јута џез со 128:115 во Солт Лејк Сити, во НБА купот. Виктор Вембањама постигна 34 поени, од кои 24 во првото полувреме. Постигна и шест тројки од 14 обиди и имаше три блокади.
Сан Антонио сега има две победи и еден пораз во Западната група Б од НБА купот и се’ уште е во игра за четвртфиналето. Кејонте Џорџ ги предводеше Џезерите со 26 поени. Џон Колинс и Колин Секстон додадоа по 20 за Јута, која има скор 0:3.
Хјустон рокитс беа подобри од Минесота тимбервулфс 117:111. Алперен Сенгун во победата на Хјустон учествуваше со трипл-дабл ефект, 22 коша, 11 асистенции и 10 скока.
Фред ВанВлит додаде 27 поени и 11 асистенции за Хјустон, кој ја освои титулата во групата А на Запад со скор 3:0 и се пласираше во четвртфиналето.
Ентони Едвардс од Минесота имаше 29 поени и 10 скока, но го промаши победничкиот удар на две секунди до крајот. Џулиус Рендл постигна 21 поен, а Наз Рид имаше 19 од клупата за Тимбервулфс, кои се на 1:2.
Милвоки бакс го победија Мајами хит со 106:103 на гости, иако играа без својата ѕвезда, Јанис Антетокунмпо. До победата ги предводеше Демијан Лилард со 37 поени и 12 асистенции.
Ова е петта последователна победа за Милвоки. За Мајами, кој има скор 1:2 во групата Б на Истокот, најдобар беше Џими Батлер со 23 поени.
Феникс санс ја прекинаа серијата од пет порази победувајќи го ЛА Лејкерс на домашен терен со 127:100. Девин Букер постигна 26 поени со 10 асистенции, а Кевин Дурент и Бредли Бил постигнаа по 23 поени.
Ентони Дејвис го заврши натпреварот со 25 поени, 15 скока и четири блокади, а Леброн Џејмс со 18 поени, 10 асистенции и осум скока за Лејкерс, за трет пораз во низа. Џејмс погоди две тројки и се израмни на седмото место со Кајл Корвер (2.450 тројки).
Чикаго булс беа подобри од Вашингтон визардс, 127:108, што е нивен 12-ти последователен пораз. Коби Вајт постигна 21 поен со осум скока, а Никола Вучевиќ 19 поени со 12 скока за Чикаго. Кајл Кузма беше најдобар во редовите на Вашингтон со 23 поени и седум скока.