Бразилскиот клуб Сантос ги прекина преговорите околу новиот договор со својата ѕвезда Нејмар, јавуваат медиумите во Бразил. Одлуката доаѓа поради загриженост за физичката подготвеност на фудбалерот и неговата висока плата, која претставува сериозен товар за клубот што се бори за опстанок во бразилската Серија А.
Нејмар, кој има 33 години, оваа сезона пропушти голем дел од натпреварите поради повреда на десниот бутен мускул. Тој е надвор од терените од 19 септември, а според последните информации, ќе му биде потребно уште време за целосно закрепнување.
И покрај тоа што односот меѓу Нејмар и раководството на Сантос останува одличен, клубот решил да ги замрзне разговорите за продолжување на соработката, барем додека не се направи целосна проценка на неговата кондиција. Неговиот сегашен договор истекува во декември.
Во сезоната по враќањето во Сантос, Нејмар одигра 21 натпревар, постигна осум голови и забележа три асистенции, но повредите повторно го спречија да ја достигне посакуваната форма.
Од Сантос нагласуваат дека клубот ќе направи нова ревизија на ситуацијата, по што ќе одлучат дали да ги обноват преговорите. Во моментов, тимот е фокусиран на битката за опстанок во елитното друштво.
