Во локалното дерби на североисточна Англија, во меч од третото коло во ФА купот, Њукасл го победи Сандерленд на гости пред околу 50.000 луѓе на „Стадионот на светлината“, со 3:0. Ова беше прв дуел меѓу двата тима од март 2016 година и прва победа на Њукасл над Сандерленд од 2011 година.
Навивачите на Сандерленд го исполнија „Стадионот на светлината“ неколку часа пред почетокот во очекување на возбудлив натпревар и на нова победа против старите ривали, но се’ падна во вода.
Њукасл се покажа како многу поквалитетен тим од Сандерленд кој игра во Чемпионшип, заслужено победи и се пласира во четвртата рунда од ФА купот.
Средбата се одигра под силно обезбедување, со огромно полициско присуство околу стадионот поради 6.000 навивачи на Њукасл кои допатуваа организирано со автобуси.
Како и сите големи ривалства, и ова меѓу Њукасл и Сандерленд е многу повеќе од спорт. Тоа е долга историја на конфликти и на непријателства меѓу двата града кои се оддалечени 15-та километри. Како и кај повеќето дербија, поделбата ги дели и семејствата и нема многу поинтензивни фудбалски натпревари во Англија од овој.