Мексико испиша нова страница во својата фудбалска историја откако со 2:0 ја совлада Јужна Африка во натпреварот што го отвори Светското првенство 2026. За првпат во историјата, мексиканската репрезентација успеа да победи на воведен натпревар на едно Светско првенство.
Пред повеќе од 80.000 гледачи на стадионот „Сиудад де Мексико“, избраниците на Хавиер Агире приредија вистински спектакл и со головите на Хулијан Кинонес и Раул Хименез стигнаа до заслужен триумф.
Свеченоста започна со настап на мексиканската актерка Салма Хајек, која ги поздрави навивачите и ја најави парадата на знамињата на сите 48 репрезентации учеснички на Мундијалот. Потоа следуваше интонирањето на химните на Мексико и Јужна Африка, а мексиканскиот пејач Алехандро Фернандез ја изведе националната химна на домаќините.
Натпреварот започна во фантастична атмосфера, а Мексико уште од првите минути покажа дека е решено да стигне до победа. Раул Хименез пропушти одлична можност во четвртата минута, но само пет минути подоцна домашните поведоа.
Во 9-тата минута, по грешка на одбраната на Јужна Африка, Хулијан Кинонес ја искористи шансата и го постигна првиот гол на Светското првенство 2026. Стадионот експлодираше од воодушевување, а неговото име засекогаш ќе остане запишано како стрелец на првиот погодок на овој Мундијал.
Јужна Африка се обиде да возврати, но Мексико целосно го контролираше натпреварот. Кинонес беше блиску до втор погодок пред паузата, кога ја погоди стативата, а одбраната предводена од Сезар Монтес сигурно ги неутрализираше ретките напади на африканската селекција.
Во второто полувреме притисокот на домаќините продолжи. Пресуден момент се случи кога Ситоле го собори Брајан Гутиерез во чиста гол-шанса и заработи директен црвен картон, оставајќи ја Јужна Африка со играч помалку.
Иако Раул Хименез не успеа веднаш да ја искористи предноста од слободен удар, искусниот напаѓач сепак стигна до својот гол. По одлична тимска акција и прецизен центаршут, Хименез со удар со глава ја затресе мрежата за конечни 2:0 и големо славје на трибините.
Во завршницата на натпреварот Јужна Африка остана и без втор играч, откако Темба Зване заработи исклучување. Гостите со деветмина фудбалери немаа сили за пресврт, а Мексико мирно го приведе натпреварот кон крај.
Последниот судиски свиреж донесе историски момент за мексиканскиот фудбал. Пред оваа победа, Мексико имаше порази од Франција во 1930 година и од Бразил во 1950 година, како и ремија против Советскиот Сојуз во 1970 и против Јужна Африка во 2010 година на отворањата на Светските првенства.
Иако капитенот Сезар Монтес во судиското продолжение доби црвен картон, тоа не ја расипа радоста на домашните навивачи. Со освоени три бода и огромна поддршка од трибините, Мексико со самодоверба ќе го дочека следниот натпревар против Јужна Кореја, кој е закажан за 18 јуни во Гвадалахара.
