Манчестер јунајтед се подготвува за еден од најголемите трансфери во својата историја, откако англиските медиуми откриваат дека клубот е подготвен да испрати мега понуда за Федерико Валверде, еден од клучните фудбалери на Реал Мадрид.
Според најавите, „црвените ѓаволи“ се подготвени да платат сума која може да надмине 100 милиони евра, со што уругвајскиот репрезентативец би станал едно од најскапите засилувања во историјата на клубот од „Олд Трафорд“.
Валверде во изминатите сезони се етаблираше како еден од најкомплетните играчи за врска во Европа, фудбалер кој комбинира енергија, агресија, дисциплина и напаѓачки инстинкт. Во Реал има статус на незаменлив играч и важен дел од иднината на клубот, што значи дека евентуалните преговори нема да бидат ни малку лесни.
Од Манчестер јунајтед веруваат дека токму играч од профилот на Валверде е клучен за комплетна реконструкција на средниот ред и враќање на клубот на највисоко ниво во Премиер лигата и Европа.
Сепак, Реал Мадрид не ја крие намерата да го задржи Уругваецот по секоја цена, а „кралевите“ би размислиле за продажба само доколку пристигне понуда што тешко може да се одбие.
Следните месеци се очекуваат да донесат јасна слика дали оваа трансфер-сапуница ќе добие реална завршница или ќе остане само уште една голема шпекулација на фудбалскиот пазар.
