Четирикратниот светски шампион во Формула 1, Себастијан Фетел, смета дека напредокот што го покажува Макс Верстапен е „застрашувачки“ и предупредува дека Холанѓанецот има сè што е потребно за да ја обележи една цела ера во најбрзиот циркус.
Во изјава за медиумите, Фетел отворено призна дека е фасциниран од тоа колку Верстапен напредува од сезона во сезона.
– Искрено, страшно е колку Макс станува подобар секоја година. Не е повеќе само суров талент, туку комплетен возач со огромна зрелост. Не е прашање дали може да ги надмине нашите достигнувања, туку кога тоа ќе се случи – изјави Фетел.
Според него, она што го издвојува Верстапен од останатите возачи не е само брзината, туку и неговиот менталитет, континуираната желба за напредок и способноста постојано да учи и да се адаптира.
Фетел посебно ја истакна и актуелната сезона, во која Верстапен, и покрај тоа што болидот на „Ред Бул“ не е доминантен како во претходните години, успева да остане во борбата за врвот.
– Дури и кога нема најдобра машина на патеката, Макс знае како да извлече максимум. Тоа е квалитет што го имаат само вистинските шампиони – додаде Германецот.
Тој смета дека конкуренцијата предводена од екипите на Мекларен и Ферари ќе има исклучително тешка задача да го симне Верстапен од тронот, бидејќи Холанѓанецот со годините станува сè посигурен, посмирен и поубиствен на патеката.
Изјавите на Фетел дополнително го зацврстуваат впечатокот дека Формула 1 и понатаму ќе се врти околу Верстапен, кој веќе важи за еден од најдоминантните возачи во историјата на шампионатот.
МОЖЕБИ ЌЕ ВЕ ИНТЕРЕСИРА:
