Арсенал славеше минимална победа од 1:0 на гостувањето кај Фулам, во натпревар од осмото коло на **Премиер лигата**.
„Топчиите“ ја контролираа играта од почеток до крај, а единствениот гол на мечот го постигна Леандро Тросар во 58. минута, по еден добро изведен корнер. Белгиецот најдобро се снајде во метежот пред голот и ја смести топката во мрежата, носејќи им три важни бода на избраниците на Микел Артета.
Фулам во текот на целиот натпревар не успеа да упати ниту еден удар кон голот на Арсенал, што е неверојатен податок за тим од Премиер лигата. Според статистиката, ова е првпат од ноември 2003 година некој противник на Арсенал да остане без шут во рамките на голот.
Со овој триумф, Арсенал ја продолжува борбата за врвот на табелата и ја потврдува својата одлична дефанзивна форма во тековната сезона.
