Селекторот на Франција, Дидие Дешан, беше задоволен од победата над Сенегал (3:1) на почетокот од Светското првенство, но призна дека неговиот тим немал лесна задача.
„Секако дека е важно да се победи на првиот натпревар, особено против толку квалитетен противник. Имавме тешкотии, но тоа им се случи и на другите репрезентации. Сенегал беше добро организиран, опасен во транзицијата и брз во нападот. Направивме одредени грешки, но ги исправивме во второто полувреме. Имаа две одлични шанси. Многу сум задоволен што успеавме да победиме“, рече Дешан на прес-конференцијата.
Францускиот селектор особено го пофали Михаел Олисе, кој придонесе за подобриот настап на тимот откако ја смени својата позиција.
„Тој е навикнат да игра на десната страна, но може да биде и поблиску до напаѓачите. Неговиот квалитет во играта со додавања беше клучен за поврзување на средниот ред и нападот. Соработуваше добро со Килијан Ембапе, кој одигра многу добар натпревар“, истакна Дешан.
Зборувајќи за Ембапе, кој постигна два гола против Сенегал, Дешан не штедеше пофални зборови.
„Тој е најдобриот напаѓач во историјата на Франција, а сепак секогаш ќе има некој да го критикува. Има способност да го промени текот на играта. Некои го критикуваат дека не учествува доволно во одбраната, но неговата улога не е да биде дефанзивец. Тој многу придонесува за тимот, иако однадвор може да изгледа како да е фокусиран само на себе. Многу е поважно да се постигнуваат голови на Светското првенство отколку на пријателските натпревари. Тој е играч кој прави разлика на големите натпреварувања“, рече Дешан.
Foto:EPA
