Кошаркарите на Милвоки бакс се новите освојувачи на НБА купот. Тие во финалето во Лас Вегас ги надиграа Оклахома Сити тандер со 97:81 и со тоа стигнаа до титулата што минатата сезона ја освоија Лос Анџелес Лејкерс, во премиерното издание на ова натпреварување.
По целосно изедначеното прво полувреме, на пауза се замина со минимална предност од 51:50 за Милвоки, кој речиси целосно доминираше во преостанатиот дел од финалниот меч кога првенствено го скрши противникот со одбраната.
Офанзивно моќниот тим на Оклахома Сити постигна само 31 поен за 24 минути игра, а Јанис Антетокунмпо, МВП на турнирот кој Бакс го освои без пораз, 7:0, го заврши натпреварот со трипл-дабл ефект, 26 поени, 19 скока и 10 асистенции, плус три блокади и две украдени топки.
Одлична поддршка имаше во Демијан Лилард, кој постигна 23 поени, додека Брук Лопез и Гери Трент Јуниор додадоа по 13 поени. Покрај тоа, Лопез имаше и девет скока.
Прв стрелец во поразениот тим беше Шеј Гилџес-Александер со 21 поен, но и слаб шут 8/24. Џејлен Вилијамс постигна 18 поени, додека Ајсаја Хартенштајн имаше 16 поени и 12 скока.