Вест Хем официјално го отпушти менаџерот Хулен Лопетеги. 58-годишниот Шпанец ги презеде „чеканите“ во јули, а неговото назначување беше објавено уште во мај. Тој го замени Дејвид Мојс, чиј договор со клубот истече, и покрај тоа што потроши 130 милиони фунти на нови играчи во текот на летото, запиша само шест победи во 20 натпревари во Премиер лигата. Вест Хем моментално е на 14. место на табелата.
Претходно денеска, клубот ја откажа прес-конференцијата на Лопетеги во пресрет на петочниот натпревар од третото коло во ФА Купот против Астон Вила. Тоа беше сигурен знак дека неговото отпуштање е прашање на часови. Сепак, тој го водеше утринскиот тренинг на тимот.
West Ham United can confirm that Head Coach Julen Lopetegui has today left the Club.
— West Ham United (@WestHam) January 8, 2025
Во своето официјално соопштение, клубот објави дека првата половина од сезоната 2024/25 не ги исполнила амбициите на Вест Хем и тоа била причината за одлуката.
Местото на Лопетеги веднаш ќе го заземе поранешниот менаџер на Челси и Брајтон, Греам Потер, кој, според пишувањата на англиските медиуми, веќе договорил две и пол годишен договор со Вест Хем.
Можно е Британецот да дебитира на петочниот меч на „Вила Парк“.