Турските власти денеска официјално објавија дека Таип Ердоган, претседателот на Турција, ќе пристигне во Германија на четвртфиналнот натпревар на Европското првенство (ЕП) меѓу Турција и Холандија.
Натпреварот ќе се игра во сабота во Берлин со почеток оД 21 часот, а следува по дипломатскиот инцидент меѓу Германија и Турција што се случи поради реакцијата на турскиот репрезентативец Мерих Демирал на осминафиналето против Австрија, 2:1.
Демирал беше стрелец на двата гола за Турција, но вториот гол го прослави со гест кој крена голема прашина.
Демирал со рацете имитирал глава на волк, а тој гест е поврзан со „Сивите волци“, ултранационалистички огранок на Партијата за националистичко движење (МХП), која е коалициски партнер на турската владејачка партија АК, предводена од претседателот Ердоган. Во Германија, потегот на Демирал беше осуден како расистички.
Европската фудбалска унија (УЕФА) покрена истрага против турскиот фудбалер, а турското Министерство за надворешни работи оцени дека покренувањето постапка против него е неприфатливо и ксенофобија.
Некои германски политички претставници реагираа поинаку. „Користењето на фудбалот како платформа за расизам е целосно неприфатливо. Чекаме УЕФА да го истражи овој случај и да ги разгледа можните санкции“, изјави Ненси Фезер, германската министерка за внатрешни работи.