На само неколку дена до стартот на Мундијалот, тензиите во француската репрезентација ескалираат. Нов спор меѓу играчите и Француската фудбалска федерација (ФФФ) се заканува да ги наруши подготовките на тимот, овој пат околу бројот на билети што играчите ќе ги добијат за своите семејства за време на турнирот.
Според авторитетното француско издание „Л’Екип“, претседателот на ФФФ, Филип Дијало, се сретнал со играчите во вторник во базата Клерфонтен, каде што тимот го посетил и претседателот Емануел Макрон. На состанокот, Дијало ја презентирал понудата на федерацијата: секој играч ќе добие по два бесплатни билети и ќе има право да купи уште шест, што вкупно ќе донесе осум влезници по играч. Сепак, оваа понуда беше оценета како крајно несоодветна од ѕвездите на тимот, што доведе до ново несогласување. И покрај тензиите, играчите ги исполнија своите обврски и учествуваа на настан со спонзорите на националниот тим веднаш по натпреварот. Сепак, на маргините се зборува дека договор за ова прашање е далеку од постигнување. Средбата послужи и за да се разговара за друго итно прашање – бонусите за перформансите на тимот. Ова прашање веќе предизвика незадоволство во март, кога ФФФ побара од играчите да прифатат намалување на нивните бонуси за Светското првенство. Сепак, по ова прашање, разговорите беа опишани како „позитивни“.
На маса е решение кое би можело да ги задоволи двете страни. Тоа предвидува да нема исплата на бонуси пред да се стигне до полуфиналето, што би ѝ овозможило на федерацијата да издвои посериозни износи за бонуси во одлучувачките фази од натпреварувањето.
Франција е дел од Групата I на Светското првенство, каде што ќе се соочи со екипите на Ирак, Норвешка и Сенегал. Првиот натпревар на „петлите“ е закажан за 16 јуни против Сенегал во Њу Џерси.
