Селекторот на Аргентина Лионел Скалони, изјави дека неговата репрезентација уште еднаш покажала дека е најсилна кога е ставена под најголем притисок, откако со нов драматичен пресврт ја совлада Англија со 2:1 и избори место во финалето на СП.
” Искрено, мислам дека овој тим го игра својот најдобар фудбал токму кога е под најголем притисок. Кога ќе се најдеме во тешка ситуација, а противникот ќе покаже и најмал знак на слабост, ние веднаш го чувствуваме тоа и се бориме со сè што имаме. Токму такво чувство ми дава оваа екипа“, изјави Скалони на прес-конференцијата по натпреварот.
Тој не го криеше задоволството од карактерот што го покажале неговите фудбалери.
„Среќен сум затоа што тимот се бореше до последната секунда, а тоа за мене е најважно. Дури и да бевме елиминирани, ќе знаевме дека сме оставиле сè на теренот“, истакна аргентинскиот селектор.
Скалони нагласи дека Аргентина го покажала своето вистинско лице откако Англија поведе со 1-0 на почетокот од второто полувреме.
” По нивниот гол покажавме сè што, според мене, треба да претставува фудбалот. Тоа не е само тактика, стратегија или атрактивна игра. Во последните 40 минути се виде сè во што веруваме како тим“, рече тој.
Селекторот ги опиша своите играчи како вистински борци.
„Кога велам дека се тврдоглави, го мислам тоа во најпозитивна смисла. Тие се вистински воини.
Израснале во средина каде што не се плашат од ништо. Постојано се натпреваруваат и секогаш се очекува да бидат најдобри.
Одговорноста не им претставува товар. Кога натпреварот ќе влезе во последните 15, 20 или 25 минути, тие и понатаму ја бараат топката. Никој не размислува што ако направи грешка и го загубиме полуфиналето на Светското првенство.“
Скалони ја истакна силната поврзаност во аргентинскиот табор.
„Тие едноставно сакаат да играат фудбал, исто како што го прават тоа целиот свој живот. Оваа екипа е како едно семејство. Никогаш не се откажува од ниту една топка и се бори до самиот крај. Ќе направиме сè што е во наша моќ да го освоиме финалето, но искрено, што повеќе може да се побара од овој тим?“, порача Лионел Скалони.