Спортскиот директор на ракометниот состав Еурофарм Пелистер од Битола, Звонко Шундовски, во интервјуто за Спортско радио 90,3 ФМ, проговори за летните активности, за новите имиња во клубот и за плановите за наредната сезона.
– Втора година по ред сме шампиони на Македонија што е голем успех за клубот. Битола живее за ракометот, а прославата на титулата траеше неколку дена, вели Шундовски
Шудовски открива дека ќе се прави состав кој ќе биде посилен од лани и што ќе бележи уште подобри резултати.
– Рбетот на тимот останува ист, условно речено првата постава, но се бројат деновите кога ќе ги објавиме новите засилувања. Ќе атакуваме на двојната круна дома, и секако посакуваме подобри резултати во Европа. Ќе направиме се’ што можеме да добиеме и „вајлд карта“ за учество во Лигата на шампиони.
По паузата, летните подготовки ќе ги почнеме на 24 јули. Сакаме да настапиме на струшкиот и на охридскиот турнир, како и на традиционалниот во Добој, БиХ што ќе биде исклучително силен, со учество на екипи кои играат во ЛШ, потенцираше Шундовски.