Култниот стадион „Ацтека“ ќе биде домаќин на првата од трите церемонии, каде светските музички икони ќе го најават најголемото фудбалски првенство.
Светската музичка кралица Шакира и нигериската афробит сензација Бурна Бој официјално ќе ја предводат церемонијата на отворањето на Светското првенство во фудбал во Мексико Сити на 11 јуни.
Светската фудбалска федерација (ФИФА) потврди дека поп-ѕвездите премиерно во живо ќе ја изведат официјалната химна „Dai Dai“ пред почетокот на првиот натпревар меѓу Мексико и Јужна Африка. Ова е почеток на историскиот Мундијал со три посебни уметнички отворања.
Церемонијата во Мексико Сити ќе започне точно 90 минути пред почетниот свиреж на отворањето на турнирот. ФИФА соопшти дека покрај главните хедлајнери, на сцената ќе се појават и бројни латиноамерикански и глобални ѕвезди, меѓу кои се Алехандро Фернандез, Белинда, Џеј Балвин, Тајла и мексиканската рок група Мана. Организаторите најавуваат колосална програма што ќе го спои традиционалниот мексикански фолклор со современиот поп-звук, вклучувајќи настапи на домородни уметници.
Овогодинешното првенство за првпат се одржува во три земји домаќини, што наметна и целосно нов концепт за почетокот на натпреварувањето.
По спектаклот во Мексико, веднаш следниот ден на 12 јуни ќе се одржат уште две посебни церемонии на отворањето во Канада и во Соединетите Американски Држави. Во Торонто, канадските домаќини ги ангажираа Аланис Морисет и Мајкл Бубле, додека во Лос Анџелес американскиот дел од турнирот ќе го отворат Кети Пери и раперот Фјучер.
