Кристијано Роналдо минатата недела ја понижи француската Лига 1, со изјавата дека првенството на Саудиска Арабија е поквалитетно од француското.
„Саудиската Премиер лига е подобра од Лига 1 во Франција. Франција го има само ПСЖ, другите клубови се далеку подолу. Обидете се да играте на 38, 39 или 40 степени и да играте во временски услови како во С. Арабија. И покрај тоа овде гледаме фантастични натпревари. Не мора да ми верувате, обидете се да дојдете и да играте таму“, рече Роналдо.
Изјавата на Роналдо воопшто не им се допадна на Французите и Португалецот се најде на мета на жестоки критики, а се чини дека најгласен во сето тоа беше Адил Рами.
Поранешниот дефанзивец на Милан реши да му одговори на Роналдо.
„Зборува глупости. Сакате да ви покажам фотографија од дефанзивци кои играат во Саудиска Арабија? Иако Роналдо имаше неверојатна кариера, тоа не значи дека се што кажува е вистина. Тоа е чист ПР кој очигледно мора да го направи“, вели Рами и додава:
„Во Франција имаме неверојатни дефанзивци кои се машини, доведете го во Лига 1 и тие ќе го изедат“.