Легендарниот Фабио Капело му одржа лекција на тренерот на Јувентус, Тиаго Мота со зборовите дека не знае како да го користи напаѓачот Душан Влаховиќ.
Капело кој во кариерата ја освои Серија А со Јувентус и Милан, Ла Лига со Реал Мадрид, а Лигата на шампионите со Милан, ги коментираше и лошите резултати на „Старата дама“ во првиот дел од сезоната.
Јуве има 14 поени помалку од лидерот Наполи, тимот на Мота 12 пати ремизираше во 19 натпревари.
„Не очекував дека Јувентус ќе остане толку далеку, особено ако се земат предвид тешките одлуки што клубот и тренерот ги донесоа во текот на летото, почнувајќи од заминувањето на Киеза. Идентитетот на тимот се уште е нејасен. Не примија досега многу голови, но се мачат да постигнат гол. Впечаток е дека играат премногу бавно и дека на противниците им е лесно да се прилагодат”, изјави Капело.
Тој имаше посебна порака за тренерот Мота, а дополнително го истакна и начинот на кој го користи својот најдобар напаѓач Влаховиќ.
„Не размислувај само за твојата идеја, туку за начинот како да се прилагодиш и да ги искористш карактеристиките на твоите играчи. Истото важи и за сите тренери, не само за Мота. Влаховиќ не е тип на напаѓач кој учествува на начин на кој тренерот би посакувал. Но и покрај тоа тој е еден од најдобрите напаѓачи во противничкиот шеснаесетник“, истакна славниот тренер.
Во последните недели се шпекулираше дека Влаховиќ би можел да го напушти Јувентус, па дури и да заврши во Манчестер Јунајтед во трампа за Џошуа Зиркзе, кој минатата сезона блескаше во Болоња под водство на Мота.