Отворањето на Светското првенство во Мексико, кое требаше да биде прослава на фудбалот со натпревар помеѓу домаќините и Јужна Африка (2:0), се претвори во сцена на жестоки конфликти. Додека светската ѕвезда Шакира воодушевуваше повеќе од 82.000 навивачи со својот глас во стадионот „Ацтеки“, вистински пекол се одвиваше пред влезот број 8.
Според извештаите на германскиот „Билд“, мирната атмосфера во арената беше прекината од морничави сцени од улиците на Мексико Сити.
Една од најголемите ѕвезди на светскиот фудбал, Бразилецот Марсело, речиси стана жртва на насилство. Поранешниот ас на Реал Мадрид се упати кон стадионот за да го гледа натпреварот, но се најде во центарот на немирите.
Благодарение на брзата реакција на безбедносните сили, Бразилецот беше спроведен под полициска заштита до безбеден дел од стадионот, додека разбеснетата толпа беше само на неколку метри од него.
Околу 2.000 маскирани демонстранти го нападнаа кордонот од 300 полицајци со сите расположливи средства – користеа петарди, камења и сè што можеа да дојдат до нив. Хулигани ограбуваа продавници во близина, превртуваа автомобили и палеа сè пред нив.
– Тука се случуваат луди сцени. Полицијата на коњи се обидува да ги контролира демонстрантите. Сè што се случува надвор е во спротивност со она што се случува внатре на стадионот, каде што луѓето уживаат во шоуто на Шакира и фудбалот. И ова е само првиот од 39 дена од Светското првенство – известуваше новинарката на „Билд“, Софија Цаи, од местото на настанот.
