Еден ден откако ФИФА ја објави намерата Светското првенство во иднина да има приватен партнер, во светот на фудбалот се крена голема бура.
УЕФА и КОНКАКАФ одлучија да ја бојкотираат ФИФА, а иста одлука наскоро се очекува да донесе и Азиската конфедерација.
Според почетната позиција, европските репрезентации нема да учествуваат на Светското првенство во 2030 година доколку претседателот Џани Инфантино ја спроведе својата идеја. Земјите од Северна и Централна Америка, исто така, го поддржаа ставот на УЕФА. Сепак, ФИФА нема намера да се откаже од својата намера, објавува Асошиејтед Прес.
„Никој не го продава фудбалот. Тоа не е нешто што ја интересира ФИФА. Го почитуваме тоа што некои се изјаснија и ги почитуваме загриженостите и сакаме да потврдиме дека сме посветени на отворена и демократска дискусија. Нашите разговори беа прекинати од неточни медиумски известувања. Ги продолжуваме консултациите и сакаме секој член на ФИФА да гласа врз основа на фактите“, се вели во соопштението на ФИФА.
Иницијативата „FIFA Forward Enterprise“ е план што може да ја зголеми сегашната вредност од околу 20 милијарди долари. Потенцијалниот инвеститор е, нема да верувате, Џошуа Кушнер или поточно неговата инвестициска компанија. Џошуа е брат на Џаред Кушнер, кој е зет на американскиот претседател Доналд Трамп.
Сите фудбалски фанови се најмногу загрижени од фактот дека претседателот на ФИФА, Џани Инфантино, имал блиски односи со Трамп во претходните години, а сè резултирало со флагрантно кршење на фудбалските правила среде турнирот поради лобирањето на Трамп. Затоа отпорот што го покажуваат УЕФА и КОНКАКАФ веројатно се темели на апсолутна недоверба кон Инфантино, а не на вистинската состојба на работите.