Фудбалерите на Шпанија ја совладаа Австрија со убедливи 3:0 и се пласираа во четвртфиналето на Светското првенство.
Европскиот шампион одигра токму онолку колку што беше потребно за сигурен пласман меѓу осумте најдобри репрезентации на Мундијалот.
Од самиот почеток Шпанците ја презедоа контролата врз играта, додека Австријците беа принудени да се бранат. Веќе во првата минута Ламин Јамал се закани по брза контра, најавувајќи ја доминацијата на својот тим.
Како што одминуваше времето, избраниците на Луис де ла Фуенте создаваа сè повеќе опасни ситуации. Микел Ојарзабал се закани со силен удар, но Александар Шлагер одлично интервенираше.
На Шпанија ѝ беше поништен и погодокот на Марк Кукуреља по корнер, поради прекршок врз голманот Шлагер. Сепак, иницијативата беше крунисана во самиот финиш на првото полувреме.
По одлична акција по левата страна, Кукуреља испрати остар центаршут кон пеналтикот, каде што Ојарзабал со удар од прва ја затресе мрежата за 1:0.
Шпанија можеше да ја удвои предноста уште пред паузата. Алекс Баена ја погоди пречката од слободен удар, а веднаш потоа Шлагер му одбрани чиста шанса на Јамал.
И во второто полувреме Шпанците продолжија со контрола на играта. Ојарзабал и Родри имаа добри можности, а во 64. минута пристигна и вториот погодок.
Повторно падна австриската одбрана по десната страна. Баена испрати прецизен центаршут, а Педро Поро одлично втрча и ја испрати топката во мрежата за 2:0.
Во тие моменти веќе беше јасно дека Австрија нема сила да се врати. Тимот на Ралф Рангник речиси и да не успеа сериозно да го загрози голот на Шпанија.
Конечните 3:0 ги постави Ојарзабал, кој со својот втор погодок на натпреварот ја потврди убедливата победа на „црвената фурија“.
Во четвртфиналето Шпанија ќе игра против Португалија, која претходно по драматичен пресврт ја елиминираше Хрватска.
