Хаити беше принудена да ги промени своите дресови пред Светското првенство во 2026 година откако ФИФА оцени дека одредени елементи од дизајнот имаат политичка конотација.
Репрезентацијата од зоната КОНКАКАФ, која ќе ја отвори групната фаза со натпревар против Шкотска во сабота, ќе настапи на Светското првенство во модифицирана опрема.
Производителот на спортска опрема Саета објави дека во соработка со ФИФА, ги имплементирал сите потребни промени за дресовите да ги исполнат прописите на светската фудбалска организација.
„Во тесна соработка со Хаитската фудбалска асоцијација, нашата цел во текот на целиот процес беше да создадеме дрес што ја слави гордоста, отпорноста и духот на хаитскиот народ. Во текот на многу месеци, развивме различни концепти, кои потоа поминаа низ стандардната постапка за одобрување на ФИФА. Конечниот дизајн беше замислен како почит кон мажите и жените кои секојдневно придонесуваат за иднината на Хаити и никогаш немаа политичка порака“, рече Саета во соопштението.
Како што додаваат, за време на прегледот, ФИФА проценила дека одредени визуелни елементи би можеле да се толкуваат различно во согласност со правилата за спортска опрема и побарала измени во дизајнот.
„Иако таквото толкување се разликува од нашата првична намера, ние ја следевме постапката и ги имплементиравме сите промени што ги побара ФИФА. Горди сме што учествувавме заедно со Хаитската фудбалска асоцијација во овој историски момент за хаитскиот фудбал и ѝ посакуваме на репрезентацијата многу успех на Светското првенство“, соопшти компанијата.
Дресовите на Хаити се достапни во сина, бела и црвена боја, со црвена јака и ракави, додека грбот на репрезентацијата се наоѓа во центарот на градите. Контроверзниот детаљ се наоѓал на десниот колк, каде што имало силуети инспирирани од Битката кај Вертие и Хаитската револуција.
Мотивот се однесува на настан во 1803 година, кога револуционерниот водач Жан-Жак Десалин, подоцна првиот владетел на независен Хаити, ја отстранил белата лента од француското знаме за да создаде ново знаме за идната држава. Тој момент сè уште се слави денес на 18 мај како Ден на знамето на Хаитите.
Хаити се квалификуваше за Светското првенство за првпат по Светското првенство во 1974 година, а сега забранетите дресови ги носеше националниот тим минатата недела на пријателски натпревари против Нов Зеланд и Перу.
