Кошаркарскиот клуб Партизан се соочува со сериозен проблем – американскиот плејмејкер Карлик Џонс ќе паузира најмалку три месеци поради тешка повреда на ногата.
Џонс се повреди на натпреварот против ФМП, кој „црно-белите“ го добија по продолжение со 109:103. Медицинските прегледи покажале дека тој ја скршил петтата метатарзална коска на левата нога, што бара подолг период на опоравување.
Оваа вест е сериозен удар за тренерот Жељко Обрадовиќ, бидејќи Џонс беше еден од најважните играчи на почетокот од сезоната во АБА лигата и Евролигата. Со неговото отсуство, Обрадовиќ ќе мора да прави промени во ротацијата, а можно е клубот да бара и ново засилување на бековската позиција.
Повредата на Џонс доаѓа во момент кога Партизан веќе има проблеми со составот, па следниот период ќе биде вистински тест за длабочината и карактерот на тимот.
