28/12/2024

(ВИДЕО) Луда ноќ во НБА. Четири „гејм винери“ и рекорден број поени

КОШАРКА
140

Ноќ полна со возбудливи настани се случи во НБА лигата. Мемфис гризлис го поставија сезонскиот рекорд според постигнати поени во еден натпревар во победата над Торонто репторс, 155:126.

Дури осум играчи постигнаа двоцифрен број поени за Мемфис, а најефикасни беа Зек Еди и Џерен Џексон јуниор со по 21 кош. Торонто го предводеше Р.Џ.Барет со 27 поени, 10 скока и девет асистенции.

Атланта хокс направи огромен пресврт, совладувајќи го Чикаго булс со 141:133. Хокс веќе во првата четвртина имаа двоцифрена негатива, која кон крајот на третата четвртина изнесуваше -21, но во последната четвртина постигнаа неверојатни 50 поени и го свртеа резултатот.

За тоа најзаслужен беше Џејлен Џонсон со 30 поени и 15 скока, додека Треј Јанг даде 27 поени, плус 13 асистенции. Зак Лавин постигна 37 поени со седум асистенции и пет скока за Булс.

Голем број на натпревари се решаваа со мала разлика, па синоќа беа погодени дури четири „гејм-винери“, односно кошеви за победа во последните секунди.

Најспектакуларни беа поените на играчот на Детроит, Џејден Ајви, кој постигна тројка со прекршок на три секунди до крајот, а потоа погоди и слободно фрлање за победа на Пистонс над Сакраменто кингс од 114:113. Кејд Канингем постигна 33 поени и 10 асистенции за Детроит, а ДеАрон Фокс 26 коша за Сакраменто.


Тајлер Херо им донесе победа на Мајами хит над Орландо меџик со 89:88 со двата поена на половина секунда до крајот на натпреварот. Со 20 поени тој беше и најистакнатиот поединец на Хит, додека кај Орландо, Џејлен Сугс постигна 29.


Прецизен беше и Скут Хендерсон на десетинка од секундата пред крајот на натпреварот, за славје на Портланд трејлблејзерс над Јута џез, 122:120. Кај Портланд одличен беше Дени Авдија со 27 поени, осум скока и шест асистенции, а Шедон Шарп постигна 27. Лаури Марканен имаше 25 за џезерите.


Џордан Пул постигна тројка за победа на Вашингтон визардс над Шарлот хорнетс со 113:110. Тој натпреварот го заврши со 25 поени и шест скока. Ламело Бол имаше 31 поен за Хорнетс со шест асистенции и скока.


Вреди да се истакне и деветтата последователна победа на Оклахома Сити тандер, на гости над Индијана пејсерс, со 120:114. Оклахома ја предводеше одличниот Шај Гилџес-Александер со 45 поени, осум скока и седум асистенции.

Сите резултати:
Индијана пејсерс – Оклахома Сити тандер 114:120
Орландо меџик – Мајами хит 88:89
Вашингтон визардс – Шарлот хорнетс 113:110
Атланта хокс – Чикаго булс 141:133
Мемфис гризлис – Торонто репторс 155:126
Милвоки бакс – Бруклин нетс 105:111
Њу Орлеанс пеликанс – Хјустон рокетс 111:128
Портланд трејлблејзерс – Јута џез 122:120
Сакраменто кингс – Детроит пистонс 113:114

Претходно
Фабијански на носилки изнесен од теренот, но е во добра состојба
Следно
Двајца едриличари загинаа на регата во Австралија

ПОВРЗАНИ НОВОСТИ






НАЈНОВО

© CBS Media. Developed by PROCESS IN. Premium Hosted by INHOST.