Германскиот прволигаш, Вердер Бремен објави дека се повлекува од социјалната мрежа Х поради пораките со омраза откако беше преземен од милијардерот, Илон Маск.
„Откако Илон Маск ја презеде платформата, под маската на слобода на изразување, на неа значително се зголеми бројот на пораки со омраза насочени кон малцинствата, ултрадесничарските пораки и теориите на заговор.
Радикализацијата на платформата ја предводи лично Илон Маск. Повеќе речиси ништо не е забрането на таа платформа, алгоритмите и контролата се целосно опаднати. Исто така, Илон Маск ја користи оваа мрежа како политичко оружје, што се виде и на неодамнешните претседателски избори во САД“, објави Вердер.
Клубот ги покани своите 600.000 следбеници да се претплатат на социјалната мрежа Блускај (Bluesky), каде што ќе можат да објавуваат пораки. Вердер е вториот германски прволигаш кој си замина од Х откако Санкт Паули го направи истото минатата недела.
Германската скијачка асоцијација го напушти X уште во ноември 2022 година, неколку недели откако Маск ја презеде мрежата. Германската одбојкарска асоцијација престана да го користи X во март годинава.
Медиумите, исто така, почнаа да го напуштаат Х (поранешен Твитер), некогаш омилена платформа на глобалните медиуми, сега обвинета дека овозможува ширење на дезинформации под водство на неговиот сопственик Илон Маск, сојузник на новоизбраниот американски претседател, Доналд Трамп.
Наведувајќи ја како причина „грубата и екстремна“ атмосфера, шведскиот лево-либерален весник Dagens Nyheter (DN) стана третиот голем медиум што овој месец престана да објавува свои написи на социјалната платформа.
Британскиот централно-левичарски дневен весник „Гардијан“ претходно објави дека повеќе нема да објавува содржини на на Х, нарекувајќи го „токсичен“.
Шпанскиот весник Вангардија (Vanguardia) го направи истото, велејќи дека попрво би изгубил претплатници отколку да остане на „мрежата за дезинформации“.
Повеќе корисници се прашуваа дали да останат на Твитер во 2022 година, кога Маск, претприемачот познат по автомобилската компанија Тесла и вселенската компанија СпшејсИкс (SpaceX), ја купи платформата и драстично ја намали умереноста на содржината во име на слободата на говорот.
Прашањето повторно се појави кога Трамп победи на претседателските избори во САД овој месец, при што Маск активно го поддржуваше. Тимот на Трамп потоа го избра Маск, најбогатиот човек на светот, да го води новиот Оддел за владина ефикасност.