Шпанецот Родри (28) стана првиот играч од средниот ред, по Лука Модриќ, кој ја освоил „Златната топка“.
Ѕвездата на Манчестер сити ја освои четврта последователна шампионска титула со „граѓаните“ во Премиер лигата сезонава и беше клучен играч за шпанската репрезентација на патот до титулата на Европското првенство (ЕП) во Германија.
Во интервју за Ел Ормигеро (El Hormiguero), одличниот играч за врска откри дека за него Лионел Меси (37) е најдобриот играч на сите времиња:
„Нема сомнеж. За мене Лео Меси е најдобар на сите времиња. Кога ќе ја прими топката, веднаш знаеш дека постои опасност, кога би се соочил со него, би се обидел да му ја одземам топката, но тој би минал како да не сум таму“.
Меси игра за Интер Мајами од јули 2023 година. Сезонава на 22 настапи има ефект од 21 гол и 11 асистенции. Во кариерата играше за Барселона и ПСЖ и освои се’ што можеше да се освои на клупски и репрезентативен план. Осум пати ја освојуваше „Златната топка“.