Поранешниот бразилски фудбалски репрезентативец Роберто Карлос објави денеска дека добро закрепнува, откако беше подложен на „превентивен медицински зафат“, негирајќи дека преживеал срцев удар.
-Би сакал да ги разјаснам неодамнешните информации што се појавија. Неодамна бев подложен на превентивна медицинска процедура, која претходно беше планирана со мојот медицински тим. Процедурата беше успешна и јас сум добро. Немав срцев удар. Во добра состојба сум, се опоравувам и се радувам на брзо враќање во целосна форма и продолжување на моите професионални и лични обврски, напиша Карлос на својот Инстаграм профил.
Светските медиуми вчера објавија дека Карлос имал операција на срцето во болница во Сао Паоло и оти интервенцијата не била претходно планирана.
Поранешниот лев бек на Реал Мадрид ѝ се заблагодари на јавноста за поддршката и истакна дека нема причина за загриженост.
-Искрена благодарност до целиот медицински тим што се грижеше за мене, додаде 52-годишниот поранешен бразилски репрезентативец.
Карлос од 1998 до 2007 година настапуваше за Реал Мадрид, со кој освои четири титули во шпанското првенство и три трофеи во Лигата на шампиони, одигрувајќи вкупно 527 натпревари за мадридскиот тим.
Со Бразил го освои Светското првенство во Јапонија и Јужна Кореја во 2002 година.
ФОТО: ЕПА
МОЖЕБИ ЌЕ ВЕ ИНТЕРЕСИРА:
