Актуелниот НБА шампион, Бостон селтикс, ја извојува петтата последователна победа на домашен терен победувајќи ги ривалите од Источната конференција, Мајами хит, со 108:89.
Шампионите остварија клучна предност во втората четвртина, па на полувреме заминаа со водство од 60:45 и потоа мирно ја одржуваа до крај. Џејлен Браун беше најефикасен кај Селтикс со 29 поени, а Пејтон Причард додаде 25 од клупата.
Со скор 17:4, Бостон е на второто место на Истокот и во целата лига. Подобар е само Кливленд со 18:3, а Мајами падна под 50 отсто и е на седмото место на Истокот со 9:10.
Минесота тимбервулфс на свој терен убедливо го победи Лос Анџелес лејкерс со 109:80. Прашањето за победникот беше решено многу брзо, па играчите од клупата на двата тима добија голема минутажа.
Со скор 10:10, Вулвс се на 11. место на Западот, додека Лејкерси се на осмата позиција со 12:9. Во последниот меч од вечерта, Чикаго булс го декласираа Бруклин нетс,128:102. Џош Гиди забележа трипл-дабл за домашниот тим со 20 поени, 13 скока и 11 асистенции.