Селекторот на македонската фудбалска репрезентација, Благоја Милевски смета дека во групата Ј, за пласман на Светското првенство (СП) 2026-та, со Белгија, Велс, Казахстан и Лихтенштајн, можеме да се надеваме на добри резултати.
– Добивме група со репрезентации со кои може да играме и да се надеваме на добар пласман. Белгија е голем фаворит, тоа е една од најсилните светски селекции и ќе биде големо изненадување доколку не успее да го освои првото место во оваа конкуренција.
Велс е одлична репрезентација, тим кој игра динамичен и брз фудбал. Се разбира дека влегуваат со свои сметки за конечниот пласман во групата, но убеден сум дека можеме да им се спротивставиме на вистински начин.
Казахстан и Лихтенштајн можеби немаат позитивни резултати во последните квалификациски циклуси, но секој нов почеток е нова надеж и за условно, помалите репрезентации во групата.
За мене е важно ние да го задржиме истиот пристап како на последните натпревари од Лига на нации, силно мотивирани да влеземе во квалификациите и додново да се бориме за резултат кој може да ни донесе можност за евентуален пласман на големо натпреварување, изјави Милевски за официјалната интернет страница на Фудбалската федерација на Македонија (ФФМ).