Реал Мадрид има многу проблеми сезонава за кои шпанските медиуми наголемо пишуваат. Во нивните текстови се отвораат прашања од типот дали Карло Анчелоти е вистинското решение за тренерската позиција и која е причината за многубројните повреди. Една од (нај)главните теми е што се случува со Килијан Мбапе.
Францускиот напаѓач пристигна во Мадрид откако постигна 256 гола и имаше 108 асистенции на 308 натпревари за ПСЖ. Како слободен играч, тој дојде во „кралскиот клуб“ со статус на мегаѕвезда, но многумина се прашуваат дали Реал го доби тоа што го сакаше.
Мбапе постигна девет гола на 18 натпревари, но не сите од игра и со многу промашувања. Промаши и од пенал против Ливерпул, а од септември до денес постигна само два гола. Во Реал очекуваат тој да се „разбуди“, но ништо не препуштаат на случајноста.
Според „Спорт“, клубот го повикал поранешниот играч и тренер Зинедин Зидан, сонародникот и идол на Мбапе, со барање да му помогне на играчот со совети. Зидан беше тој што му го препорача Мбапе на клубот.