Сала не заигра во Лигата на шампионите, ама елитните клубови ќе го испочитуваат

Лигата на шампионите продолжува денеска со натпреварите од осминафиналето, а УЕФА одлучи дуелите да почнат со едноминутно молчење во чест на загинатиот фудбалер на Нант, Емилијано Сала.

Аргентинскиот фудбалер загина во авионска несреќа на 21 јануари додека леташе од Нант во Кардиф. Еден ден претходно го комплетираше својот трансфер во премиерлигашот, но не дочека да заигра за овој клуб.

„Во име на сите од УЕФА, сакам да изразам сочувство до семејството на Емилијано Сала. Тоа е загуба за сите нас, тажен сум што еден живот е загубен на таков начин. Ние не смееме да го заборавиме“, изјави претседателот на УЕФА, Александер Чеферин.

Покрај едноминутното молчење, сите фудбалери ќе носат црни ленти околу рацете.