Мане за посилен Металург: Уште еден Французин во Автокоманда

Три дена по доаѓањето на португалското лево крило Рибеиро, Металург се засили и на позицијата лев бек. Нов ракометар на Металург е Французинот Абдула Мане, кој со нашиот клуб потпиша двегодишен договор.

Мане (190 см, 85 кг) е млад 25-годишен ракометар кој доаѓа од Дижон, а претходно настапувал и во Безансон, Белфорт и Мулхаус и беше најдобар стрелец на Про лигата, односно втората француска лига.

Мане игра на позиција лев бек, но е исклучително корисен и како дефанзивен играч. По браќата Њокас, Мане е третиот француски ракометар во нашите редови и е седмото засилување на Металург за претстојната сезона. Покрај Мане, браќата Њокас и Рибеиро, Металург го засилија и пикерот Костадин Петров, средниот бек Бобан Каковски и голманот Димитар Бардаковски.

Нашиот играчки ростер се уште не е затворен, па се можни и други засилувања со кои раководството на клубот планира да создаде конкурентност и подолга клупа во Металург.