„Македонецот“ гази: Шортс по четврти пат, играч на колото во Бундеслигата

Натурализираниот македонски репрезентативец Ти Џеј Шортс уште еднаш ја разнесе конкуренцијата во германското првенство.

Четврти пат во последните осум кола, плејмејкерот на Телеком Бон е прогласен за играч на колото во Бундеслигата со што уште еднаш ја потврди фаворитската улога за признанието за МВП на сезоната. И сега, како и на претходните натпревари, немаше дилема бидејќи против Олденбург постигна 30 поени со 92% прецизност од игра и индекс 42.

Во германското првенство досега се одиграни 16 кола што значи дека Шортс, во просек, е МВП на колото во секој четврти круг. Благодарение на него, Телеком Бон во моментов е на делба на првото место во Бундеслигата со шампионот Алба кој има натпревар помалку.

Формата на Шортс е одлична вест за селекторот Александар Јончевски пред февруарскиот „прозорец“ од претквалификациите за Европското првенство во 2025 година во кои македонската репрезентација ги игра клучните дуели против Словачка и Норвешка.