Хаос во Рим – прободени четворица навивачи на Севиља

Ултраси на Лацио предизвикаа нов скандал во пресрет на 1/16-финалето од Лигата Европа меѓу нивниот тим и Севиља.

Фотографии и снимки на Твитер покажуваат дека најмалку четворица се ранети со убоди од нож од кои еден е в болница во тешка состојба. Меѓу ранетите има двајца Шпанци и по еден Англичанец и Американец.

„Десетина маскирани млади луѓе, облечени во црно со ножеви бркаа некого кој влезе да се скрие во ресторан. По доаѓањето на полицијата тие се разбегаа“, пишува весникот Ил Месаџеро.

Последната деценија навивачите на Лацио беа протагонисти во серија фашистички и расистички акции на и надвор од стадионот на кој игра римскиот клуб. Нивната идеологија, тотално спротивна од онаа на навивачите на Севиља, Бирис Норте, се претпоставува дека е главна причина за синоќешниот инцидент во Рим.