Ѓоковиќ: Другите нека одлучат дали Федерер е најдобриот на сите времиња

Новак Ѓоковиќ изјави дека настапот на Австралија Опен на почетокот на 2023 година, на Грен слем турнирот на кој му беше забранет настап на почетокот на оваа година, не е во негови раце. Тој го коментираше и пензионирањето на неговиот голем ривал Роџер Федерер.

„Не можам многу да ви кажам за настапот на Австралија Опен следната година. Таквата одлука не е во мои раце. Можам само да се надевам дека ќе бидам на терените во Мелбурн”, им рече Ѓоковиќ на новинарите во Лондон, каде што е на Лејвер куп, кој ќе се одржи од 23 до 25 септември.

Годинава Ѓоковиќ доби забрана за учество на Австралија Опен и УС Опен поради неговото одбивање да се вакцинира против коронавирусот. Го освои Вимблдон, а инаку е рекордер по број на титули на Австралија опен, каде што во кариерата освои дури девет пати (2008, 2011, 2012, 2013, 2015, 2016, 2019, 2020 и 2021 година).

Ѓоковиќ беше прашан и за неговиот ривал на теренот, Роџер Федерер, кој пред неколку дена најави повлекување од тенисот.

“Секогаш ќе има дебата за тоа кој е најдобар на сите времиња, но тоа им го оставам на другите како тема. Но, влијанието на Федерер врз тенисот беше огромно. Тој не е само еден од најдобрите тенисери на сите времиња, туку и еден од најголемите спортисти на сите времиња. Неговата популарност на теренот и надвор од него е огромна и говори сама за себе. Стилот на неговиот тенис беше совршен“, се осврна на Федерер 35-годишниот српски тенисер.