(ФОТО) Повредата е минато за Столе, капитенот на Вардар се враќа уште посилен

Капитенот на европскиот шампион Вардар и македонски ракометен репрезентативец, Стојанче Стоилов, поради повреда на коленото беше подлегнат на операција од која сега успешно се опоравува.

Болките се веќе минато и тој веќе од утре ќе може да започне со вежби и со физикална терапија информираа од болницата „Аџибадем Систина“, а сподели и РК Вардар преку социјалните медиуми.

„Проблемите со коленото се веќе минато за Столе Стоилов. Неколку дена по операцијата капитенот на RK Vardar на денешниот контролен преглед ни откри дека се чувствува одлично и дека е среќен што повеќе ја нема болката која му ги отежнувала секојдневните активности. Докторите, пак, велат дека интервенцијата поминала во најдобар ред, а веќе од утре Столе може да почне со вежби и физикална терaпија, коишто ќе потпомогнат за побрза рехабилитација. Му посакуваме брзо опоравување и што поскоро враќање на терените“, порачаа од болницата каде Стоилов го оперираше коленото.

Стоилов подолго време мака мачеше со повредата на коленото, а по завршувањето на сезоната одлучи да замине под нож, откако претходно го одигра мечот против Турција во квалификациите за ЕП 2020, а го пропушти мечот со Грција токму поради неопходната хируршка интервенција.